O Concello de Ames, a través do Servizo de Normalización Lingüística e do departamento de Promoción Económica, pon en marcha por segundo ano consecutivo o Premio Lingua e Empresa, co obxectivo de recoñecer o uso e fomento da lingua galega na actividade empresarial. Optarán a este galardón todas as empresas, con sede social ou centro de actividade no concello de Ames, que sexan propostas ata este xoves, 31 de outubro, por calquera persoa ou entidade, ou pola propia empresa que queira participar.

Este xoves, 31 de outubro, realizarase o pleno ordinario do mes de outubro no que a Corporación municipal debaterá sobre a aprobación do expediente de licitación do Servizo de Axuda no Fogar do Concello de Ames. Tamén se tratará a revisión ordinaria do canon principal e do canon da ampliación do contrato de limpeza viaria e xestión do punto limpo; a proposta de modificación da porcentaxe de financiamento da subvención nominativa á Agrupación de Voluntarios de Protección Civil; a proposta de revogar parcialmente o acordo de delegación de competencias en materia tributaria na Deputación da Coruña; a modificación das ordenanzas fiscais do ICIO e do IBI; e sobre dous expedientes de investigación patrimonial e un expediente de deslinde. Estes temas foron previamente tratados este luns, 28 de outubro, nas comisións informativas.

Este domingo deuse por clausurada a décimo cuarta edición do Festival de Maxia de Ames, que se desenvolveu dende o luns 21 ao domingo 27 de outubro. O festival, organizado polo Concello de Ames en colaboración coa Deputación da Coruña e Abarajar Producciones, contou con arredor de 1.000 asistentes aos espectáculos máxicos que se desenvolveron durante a fin de semana, nos que houbo obradoiros, o espectáculo “Momentos Máxicos co Mago Rafa” e catro sesións da Gala Máxica Internacional.

O concelleiro de Turismo, Manuel Lens, e maila técnica municipal de Turismo, Sonia Moure, participaron o pasado 18 de outubro no Encontro Internacional. O Vákner, un monstro do medievo no camiño de Fisterra e Muxía, celebrado no concello de Dumbría. Ames é un dos concellos polos que discorre o Camiño Real de Santiago a Fisterra-Muxía. Existe constancia deste monstro, O Vákner, grazas a un bispo de Armenia que peregrinou no século XV durante oito anos dende o seu país ata Fisterra. Este bispo deixou constancia da presenza dun monstro nos montes situados entre Compostela e Fisterra, ao que chamou O Vákner, e que asaltaba aos peregrinos.