O Concello de Ames, a través da Concellaría de Benestar Social, informa de que este luns, 21 de outubro, saíu publicada, no Boletín Oficial da Provincia (BOP), a convocatoria de axudas destinadas ao apoio económico das familias numerosas do municipio. A contía total destinada a estas axudas é de 120.000 euros, sendo de 1.200€ o máximo do importe individual concedido a cada unidade familiar. Con esta iniciativa, o goberno municipal pretende axudar a aquelas familias que máis dificultades económicas teñan para a crianza das súas fillas e fillos. As persoas interesadas poderán presentar as solicitudes no Rexistro Xeral, de xeito presencial, ou a través da Sede electrónica, no prazo dun mes. O prazo para presentar as solicitudes remata o xoves 21 de novembro de 2019. Para obter máis información pódese chamar aos números de teléfono 981 535 941 e 981 890 964.

Dende o pasado 1 de outubro un grupo de 20 persoas está a participar no obradoiro de lingua e cultura “En galego, co teu acento!” que se desenvolve no Pazo da Peregrina, en Bertamiráns. Trátase dunha actividade gratuíta de 30 horas de duración que se imparte de luns a venres. A través desta actividade, dirixida a persoas de fóra de Galicia, preténdese que os/as participantes adquiran nocións básicas de lingua e cultura galegas para contribuír á súa integración. Este mesmo obradoiro vaise a realizar na Casa da Cultura do Milladoiro durante o mes de novembro. Se queres participar neste obradoiro aínda quedan algunhas prazas dispoñibles.

Este domingo, 20 de outubro, celebrarase, a partir das 10.30 da mañá, a vixésima edición da Carreira Pedestre Popular do Concello de Ames. Este ano vólvese a repetir a tendencia de superar os 1.400 participantes, con 484 persoas inscritas para a carreira absoluta e 921 para as escolares. Esta proba pertence ao VII Circuíto de Carreiras Populares da Deputación da Coruña e conta cun circuíto de 10 quilómetros homologado pola Real Federación Española de Atletismo.

O alcalde de Ames, José Miñones, mantivo unha xuntanza institucional co vicepresidente da Confederación Galega de Persoas con Discapacidade (COGAMI), Ramón Sestayo Lestón. Esta xuntanza serviu para coñecer de primeira man a contratación social responsable que a entidade está a levar. Esta toma de contacto co goberno de Ames tamén permitiu avanzar no traballo que desenvolve esta confederación en Ames e os futuros proxectos que se poidan levar a cabo conxuntamente.