O Pazo da Peregrina de Bertamiráns acolle ata o vindeiro día 20 de marzo a exposición de pinturas “Esencia da alma”, de Roberto Castro, coñecido artisticamente como Roca. Nesta exposición, os visitantes poderán observar algunhas das obras do artista arzuano, destacadas polo uso de cores moi vivas e ilustracións que dan pé á imaxinación.

O Concello de Ames, a través do departamento de Cultura, continúa coa programación do Ames Cultural 2025. Desta volta, o auditorio da Casa da Cultura de Bertamiráns ás 20.30 horas, acollerá a representación da peza “Un Deus salvaxe” da compañía Talía Teatro, unha comedia satírica da sociedade actual. A ocupación ata o momento é do 72% das butacas dispoñibles. Aínda se poden adquirir entradas na Billeteira electrónica do Concello de Ames. Esta programación forma parte do convenio de colaboración entre a Axencia Galega das Industrias Culturais (AGADIC) e o Concello de Ames.

A Xunta de Goberno Local do Concello de Ames aprobou o pasado 20 de febreiro as convocatorias de subvencións para a promoción de festas populares e actividades levadas a cabo polas asociacións culturais no exercicio 2025. O prazo para solicitar estas axudas, que suman unhas contías de 30.000 euros para as actividades culturais e de 25.000 euros para as festas, estará aberto entre o 1 e o 31 de marzo. Premendo nestas ligazóns pódese obter máis información sobre a convocatoria para as festas populares e para as actividades levadas a cabo por asociacións culturais.

O Concello de Ames, a través da Concellería de Cultura, informa de que ata o 6 de marzo estará aberto o prazo para que as agrupacións musicais non profesionais do concello de Ames participen nas festas populares ou actividades orientadas á dinamización sociocultural de 2025. Posteriormente, os grupos de música tradicional e corais non profesionais inscritas poderán ser solicitadas por asociación e comisións de festas municipais dentro da convocatoria de subvencións en especies para as festas populares celebradas no 2025. A través desta iniciativa búscase fomentar a celebración das festas e colaborar na súa organización, facendo máis doada o labor que está a desenvolver o tecido asociativo e as comisións de festas do concello no eido da dinamización sociocultural. En 2025 a contía total desta liña de axudas ascenderá a 24.000 euros. Premendo nesta ligazón podes consultar as bases da convocatoria.