Desde este mércores, 18 de decembro, xa están á venda os bonos culturais da programación municipal de artes escénicas para o primeiro semestre de 2025. Cun custo de 25 euros, este bonos supoñen un desconto do 50% do importe total das entradas das funcións programadas para adultos. A Concellería de Cultura pon a disposición da veciñanza 50 bonos, que poderán adquirirse ata o 7 de xaneiro de 2025, ou ata fin de existencias, na Billeteira electrónica do Concello de Ames. Dende a Concellaría de Cultura anímase á veciñanza a que regale cultura a través de ditos bonos. Pódese consultar a programación cultural completa premendo nesta ligazón. Ademais, realizáronse melloras nas funcionalidades da Billeteira electrónica co obxectivo seguir impulsando esta aplicación e que vaia máis alá da venda de entradas.

O auditorio da Casa da Cultura de Bertamiráns acolleu este pasado domingo, 15 de decembro, o tradicional concerto de Nadal no que actuaron diferentes grupos de baile e música tradicional do noso concello. O evento, enmarcado dentro da programación de Nadal en Ames, estivo protagonizado pola actuación de Os Castros, Pandereteiras da Costaneira, Os Retranqueiros, Airiños do Paseo do Colón, As Maianas e a Requinta da Maía (A. C. Follas Novas).

O Concello de Ames, a través da Concellaría de Cultura, volve a programar a Mostra de Teatro Afeccionado. Deste xeito, o auditorio da Casa da Cultura do Milladoiro e mailo local social de Bugallido acollerán, os días 4, 5, 6, 7 e 8 de decembro, cinco representacións teatrais a cargo de compañías de Ames, Teo, Brión, Outes e Ribeira. Os convites poden adquirirse na Billeteira electrónica. No caso de haber convites dispoñibles, tamén se poden coller o propio día do espectáculo. Para ver a obra A Visita en Bugallido a entrada é libre ata completar aforo, non é preciso sacar convites na Billeteira como para as outras representacións teatrais que son no auditorio da Casa da Cultura do Milladoiro.

O Concello de Ames finaliza este venres 29 de novembro a súa programación teatral deste segundo semestre do 2024, deseñada polo departamento de Cultura, coa representación da obra “Testosterona”, de Malasombra Producións, ás 20.30 horas, no auditorio da Casa da Cultura de Bertamiráns. O espectáculo pecha o programa de artes escénicas do municipio destes derradeiros meses do ano e súmase así ás obras xa representadas este pasado mes de outubro, “Geometría del alma” e “Go Home”. Este espectáculo enmárcanse dentro da programación da Rede Galega de Teatros, subvencionada pola Axencia Galega das Industrias Culturais (AGADIC).