A Casa do Cruceiro, situada no lugar de Raíces, pertencente á parroquia de Biduído, acolleu esta mañá a presentación da décimo oitava edición do ‘Outono Gastronómico en Turismo Rural’. A dita presentación foi convidado o alcalde de Ames, Blas García, que asistiu xunto ao director de Turismo de Galicia, Xosé Merelles, á delegada da Xunta de Galicia na provincia da Coruña, Belén Docampo, ao presidente de FEGATUR, Francisco Xabier Almuíña, e ao vicepresidente do Clúster do Turismo de Galicia, Jesús Picallo. O ‘Outono Gastronómico en Turismo Rural’ desenvolverase dende o 13 de setembro ata o 15 de decembro de 2024.  A Casa do Cruceiro é un dos 77 establecementos participantes este ano. Ofrécense desde menús especiais, ata paquetes con estadías e nalgunhas das casas e tamén haberá actividades como paseos a cabalo, descenso en canoa ou sendeirismo.

Os alcaldes de Ames, Blas García; Brión, Pablo Lago; Dodro; Xabier Castro; e Padrón, Anxo Arca, asinaron este martes na sede da Fundación Rosalía o convenio polo que os catro concellos acordan traballar conxuntamente na xestión, desenvolvemento e promoción turística da Ruta Rosaliana-As pegadas de Rosalía, un itinerario que percorre lugares intimamente vencellados á vida e á obra de Rosalía de Castro.

Esta semana o concelleiro de Turismo e alcalde de Ames, Blas García, visitou o punto de atención ao peregrino e de información turística. Este punto comezou a funcionar por segundo ano consecutivo o pasado 15 de xuño, e estará aberto ata o 15 de setembro.  Esta iniciativa xorde da colaboración do Concello de Ames coa Asociación de Amigos do Camiño Portugués en Ames e Teo. O seu obxectivo é acoller e prestar atención e información ás/aos peregrinas/os e persoas usuarias do albergue e da área de autocaravanas sobre os servizos e recursos culturais, patrimoniais e turísticos de Ames.

O Concello de Ames, a través do departamento de Turismo, puxo en marcha a iniciativa Café con Verso, para renderlle homenaxe a Rosalía de Castro. O Café con Verso estivo amenizado por intervencións musicais a cargo de Luís O’Caruncho e Oli Xiráldez en diversos establecementos hostaleiros do concello, nos que tamén se repartiron tarxetas con versos rosalianos para difundir a obra e o pensamento de Rosalía. Ademais, con motivo da celebración do Día de Rosalía, o  Concello tamén organizou a actividade Caldo de Gloria nos comedores escolares municipais, nos que se repartiron manteis co poema “Miña casiña, meu lar”.