A Xunta envioulle este martes, 15 de febreiro, ao Concello de Ames unha nova proposta alternativa para optimizar os servizos de autobús entre Ortoño e Bugallido con Santiago de Compostela. A Xunta propón asumir un incremento de frecuencias na liña que conecta as parroquias de Ortoño e Bugallido con Santiago, no marco da concesión de autobús interurbano. Ademais, a proposta remitida optimiza o número de servizos da nova liña municipal, que deberá poñer o Concello para completar a oferta aos usuarios, reducindo considerablemente o custo. A Dirección Xeral de Mobilidade convida ao Concello de Ames a valorar a alternativa proposta, que reduce o custo económico para a Administración local, á vez que se axusta mellor ás necesidades de mobilidade dos veciños do rural. A vindeira semana realizarase unha xuntanza coas asociacións de veciños/as de Ortoño e Bugallido para coñecer a súa valoración sobre dita proposta. Preme nesta ligazón para consultar a proposta feita pola Xunta.

Este xoves, 11 de marzo, a Xunta de Goberno Local aprobou a adxudicación do contrato de adecuación e instalación do alumeado público no sendeiro que une a localidade de Bertamiráns co CEIP Agro do Muíño. Este proxecto foi adxudicado á empresa Montaxes Eléctricos Fernández SL por un importe de 30.189,50 euros (IVE incluído). Dita actuación está cofinanciado polo Fondo Europeo de Desenvolvemento Rexional (FEDER), no marco do Programa Operativo Plurirrexional de España 2014-2020.

A Concellaría de Mobilidade, coa colaboración da Policía Local, organiza un proxecto educativo para concienciar aos nenos e nenas sobre as normas básicas de seguridade viaria. Celebrarase o sábado 12 de xuño cunha serie de actividades dirixidas a nenos e nenas de 6 a 12 anos. A xornada terá lugar no Aparcadoiro da Rúa Palmeiras en Milladoiro ás 17:00 horas. Para asistir é preciso inscribirse, antes do 11 de xuño ás 12.00 horas, enviando un email a mobilidade@concellodeames.gal indicando nome e idade do neno ou nena. O/as participantes deberán levar bicicleta, casco e máscara.

Esta mañá o Goberno municipal presentou no Milladoiro a nova campaña “Os Camiños da Saúde”. Trátase de dous “pasominuto” que inclúen recorridos entre puntos de interese en Bertamiráns e no Milladoiro medidos en pasos e minutos aproximados, para que a veciñanza gañe saúde con cada paso. Propóñense diferentes tramos urbanos para facer camiñando, que van dos 50 ao 11.00 pasos en Bertamiráns, e dos 50 aos 8.000 pasos no Milladoiro. Un “pasominuto” é un mapa esquemático de percorridos entre puntos de interese de O Milladoiro e Bertamiráns medidos en pasos e minutos. O obxectivo é incorporar na vida diaria da veciñanza o hábito de andar e gañar en saúde con cada paso que deamos. Premendo nesta ligazón podes descargar o pasominuto de Bertamiráns e do Milladoiro.