O programa do Apego segue a ofrecer unha ampla oferta de actividades para as crianzas amesás ao longo deste vindeiro mes de abril. Desta volta, co espectáculo do Mago Paco “A Maxia está nos contos”, que se desenvolverá o venres 11 de abril, ás 18.00 horas, na Casa da Cultura do Milladoiro. O prazo de inscrición está aberto ata o xoves día 10. Non se admitirán inscricións fóra de prazo e as prazas asignaranse por orde de recepción de solicitude. Para participar, é preciso enviar un correo ao enderezo electrónico normalizacion@concellodesmes.gal no que se indique o nome e apelidos das persoas que queren asistir, idade das crianzas e un teléfono de contacto.

Bugallido continúa coas súas xornadas sobre saúde enmarcadas no programa “Abril, mes da saúde en Bugallido”. Deste xeito, o Centro Cultural Mahía acolle no día de mañá, 3 de abril, ás 19.30 horas, a segunda sesión, co relatorio “Vacinas. Salvando vidas”, impartido por Pablo Varela García, internista da Unidade de Enfermidades Infecciosas do CHUS. A entrada será libre ata completar aforo e pode achegarse calquera persoa interesada en participar.

A Xunta de Galicia vén de aprobar este luns, 31 de marzo, o prego de cláusulas administrativas, o expediente de contratación, o gasto e a apertura do procedemento de adxudicación para a construción do novo centro de educación infantil e primaria no Milladoiro. O expediente de contratación publicouse hoxe no portal de Contratos Públicos de Galicia. O centro, que acollerá a 450 alumnos e permitirá atender as necesidades educativas dunha poboación en aumento, será o primeiro colexio construído en base ás pautas establecidas no Plan de Nova Arquitectura Pedagóxica que deseña espazos educativos máis abertos, flexibles, sustentables, intelixentes e integrados na contorna.

A Aula Municipal Tecnolóxica da Información e da Comunicación do Milladoiro (AMTIC) oferta unha nova programación de cursos para abril e maio, con clases dirixidas tanto a adultos coma para menores. As temáticas destes cursos abranguen contidos moi amplos e útiles para o mundo dixital, no caso dos adultos, dende a aprendizaxe básica do teléfono móbil, as utilidades de internet na nosa vida diaria ata o uso das aplicacións de Writer e Calc de LibreOffice, e no caso dos menores, un uso de ferramentas do Scratch e Pixelart! ou tamén mecanografía. As persoas interesadas en participar nalgún dos cursos poden facelo enviando cuberta a ficha de inscrición ao enderezo electrónico informatica.milladoiro@gmail.com, chamando a través do teléfono 674 594 843 ou achegándose ata a aula AMTIC do Milladoiro en horario de luns a venres de 10.00 a 12.30 horas e de 16.00 a 20.00 horas.