Este xoves, 26 de setembro, realizarase o pleno ordinario do mes de setembro no que a Corporación municipal debaterá sobre a aprobación do suplemento de crédito 2/19, financiado con remanente de tesourería, para financiar o proxecto de adquisición dun ben inmoble para o seu uso como centro Coworking; a adhesión á Central de contratación da Federación Española de Municipios e Provincias (FEMP); a aprobación do proxecto modificado da segunda fase de mellora da accesibilidade universal en edificios públicos; e maila proposta do concelleiro de Ciudadanos, José Ramón Oulego, relativa á instauración dunha hora sen ruído en todas as festas do Concello de Ames. Estes temas foron previamente tratados o pasado venres, 20 de setembro, nas comisións informativas.

Esta tarde o vicepresidente da Xunta de Galicia, Alfonso Rueda, o alcalde de Ames, José Miñones, o concelleiro de Protección Civil, Blas García, o director xeral de Emerxencias e de Interior, Santiago Villanueva, e mailo delegado territorial da Xunta na Coruña, Ovidio Rodeiro, fixeron entrega no salón de plenos da Casa do Concello, en Bertamiráns, dos carnés de voluntarios/as aos membros da Agrupación de Protección Civil de Ames. Neste acto tamén participaron outros membros do goberno municipal, así como dos partidos políticos con representación na Corporación municipal. Na actualidade, a Agrupación de Protección Civil do Concello de Ames está formada por un grupo de 34 persoas, que están divididas en catro grupos de traballo.

O alcalde de Ames, José Miñones, recibiu de mans do ministro en funcións de Ciencia, Innovación e Universidades en funcións, Pedro Duque, a distinción de “Ciudad de la Ciencia y la Innovación” de 2018. O auditorio do Palacio de Congresos de Castellón acolleu a cuarta convocatoria destes galardóns que o Ministerio concede, a través da Red Innpulso, ás cidades que destacan por promover a innovación nos seus territorios, definindo políticas e potenciando estruturas, institucións e empresas locais cun forte compoñente científico, tecnolóxico e innovador. O Concello de Ames logrou este distintivo xunto a Onda, Benidorm, Paterna, Barcelona, Castelló, Vigo e Eibar. Ames foi merecedor de tal distinción gracias á presentación do proxecto Innov@mes. O Concello pasa a formar parte así dos 72 Concellos que conforman a Red Innpulso e dos 5 de toda Galicia con Vigo, Coruña, Santiago e Riveira.

O Concello de Ames desenvolveu a pasada semana unha serie de actividades para conmemorar a Semana Europea da Mobilidade (SEM) 2019, que se celebrou do 16 ao 22 de setembro baixo o lema “Camiña e pedalea de maneira segura”. Co obxectivo de fomentar a mobilidade sostible, circular e camiñar de forma segura, houbo actividades reivindicativas e de seguridade viaria, charlas nos institutos do concello, un concurso de debuxo, marchas e andainas familiares, etc. As actividade de Conduce seguro en bico pola cidade e Marcha familiar en patinete, patíns, skate, camiñando..., prevista para o sábado, houbo que suspendelas debido as inclemencias meteorolóxicas.