Actualidade
Luns, 25 de abril de 2022
Os departamentos de Bibliotecas e de Normalización Lingüística de Ames celebraron este sábado 23 de abril o Día Internacional do Libro, cunha serie de propostas ao longo de toda a xornada. Neste senso, o Pazo da Peregrina acolleu pola mañá a presentación do libro cos textos finalistas do XVIII Certame Literario de Ames, ao que acudiron varias das persoas gañadoras da edición de 2021 do premio. Ademais, as bibliotecas amesás organizaron varias actividades para todos os públicos ao longo do día, que incluíron obradoiros e sesións de contacontos, polas que pasaron arredor dun cento de persoas. Preme aquí para consultar a galería de fotos da presentación do libro do XVIII Certame Literario.
Xoves, 21 de abril de 2022
Os departamentos de Bibliotecas e de Normalización Lingüística amesáns preparan, co gallo da celebración do Día do Libro este sábado 23 de abril, unha serie de propostas ao longo de todo o día no Pazo da Peregrina, en Bertamiráns. Ao mediodía, ás 12:00 horas, presentarase a compilación dos textos gañadores da edición de 2021 do Certame Literario de Ames. Xa pola tarde, o pazo acollerá dúas sesións de contacontos para público infantil, de 17:30 a 19:30 horas, e outra para as persoas adultas, a partir das 19:30 horas, con servizo de conciliación incluído. Ademais, será o último día para participar no sorteo de 800 euros en vales para catro librarías amesás.
Martes, 19 de abril de 2022
O departamento de Bibliotecas amesán prepara para esta semana un novo encontro literario co gallo do mes do libro, de novo coa presenza de autoras e autores residentes en Ames. Este xoves 21 de abril, Mariña Pérez Rei e Rafa Vilar estarán a partir das 20:00 horas no Pazo da Peregrina, en Bertamiráns, nun evento con entrada libre ata completar aforo.
Martes, 05 de abril de 2022
As bibliotecas amesás organizan polo mes do libro dous “Encontros Literarios en Ames”, protagonizados por ata catro autoras e autores residentes no concello. Este mesmo xoves 7, Charo Pita e Carlos Labraña pasaranse ás 20:00 horas polo Pazo da Peregrina, en Bertamiráns, mentres que o día 21 será a quenda de Mariña Pérez Rei e Rafa Vilar, á mesma hora e na mesma localización habituais. A entrada será libre ata completar aforo.
Luns, 04 de abril de 2022
O departamento de Bibliotecas de Ames organiza polo mes do libro unha rifa de cheques regalo entre todas aquelas persoas que merquen libros nas librarías Lenda, Máinomen e Huargo Artis, en Bertamiráns, ou na papelaría O Tinteiro no Milladoiro, entre o 28 de marzo e o 23 de abril. Cada establecemento contará con oito premios de 25 euros, que se poderán gastar ata o 31 de maio. O sorteo realizarase o 27 de abril nas bibliotecas de Bertamiráns e do Milladoiro. Preme aquí para consultar as bases do sorteo ao completo.
Martes, 29 de marzo de 2022
O departamento de Bibliotecas do Concello de Ames prepara co gallo da celebración do mes do libro unha serie de obradoiros, sesións de narrativa oral, concursos e sorteos coa lectura e a literatura como temática central. As actividades comezan este 31 de marzo co espectáculo de música e narrativa “Little Neno”, mentres que catro librarías do concello reparten participacións dende este luns 28 ata o sábado 23 de abril para un sorteo de 800 euros en cheques de compra.
Sábado, 26 de marzo de 2022
As bibliotecas de Ames presentan unha nova sesión de música e de contos para a cativada, nesta ocasión con "Little Neno descobre... Os Beatles". A editorial A Reixa combina teatro, narrativa e música en directo para dar a coñecer a un dos grupos de maior renome da historia da música pop. A proposta, orientada ao público familiar, terá lugar o xoves 31 de marzo ás 18:00 horas, na Casa da Cultura de Bertamiráns. Os convites, de balde, poden retirarse xa na Billeteira electrónica do Concello de Ames. O espectáculo poderá seguirse en lingua de signos.
Martes, 15 de marzo de 2022
Continúan en marzo os encontros literarios do Departamento de Bibliotecas, nesta ocasión con Inma López Silva e a súa novela “O libro da filla”, Premio da Asociación de Críticos Literarios 2020. A presentación terá lugar o mércores 16 de marzo, no Pazo da Peregrina de Bertamiráns, ás 20:30 horas. A autora será presentada polo profesor, autor e crítico literario Xosé Antón López Silva, e acompañada pola concelleira de Cultura, Natividade González. O evento, con entrada libre ata completar aforo, é parte da programación do 8M do Concello de Ames.
Xoves, 10 de marzo de 2022
As bibliotecas amesás continúan cos actos polo 8M coa celebración do seu cuarto encontro literario do ano. Neste caso, terá lugar a presentación da revista MujerArt Magazine. Será o sábado 12 de marzo, ás 13:00 horas, no Pazo da Peregrina de Bertamiráns. Presentarán o acto Petronila Daza e Bea López Jerez, cunha “performance” a cargo das artistas multidisciplinares Natalia Horschovski, Celia Pía e Paula Quintas. Acompañan a concelleira de Cultura, Natividade González, e a concelleira de Igualdade, Luisa Feijóo. O evento, con entrada libre ata completar aforo, é parte da programación do 8M do Concello de Ames.
Mércores, 02 de marzo de 2022
As bibliotecas municipais amesás acollen no seu terceiro encontro literario do ano á escritora Ana Veiga, que presentará o seu primeiro libro “La sonrisa permite respirar al alma”. Será este xoves 3 de marzo no Pazo da Peregrina de Bertamiráns, ás 20:30 horas. Acompañarán á autora Josefa F., amiga da escritora, e a pandeireteira María Fabiola, nun acto presentado pola concelleira de Cultura, Natividade González, e a concelleira de Igualdade, Luísa Feijóo. O evento, con entrada libre ata completar aforo, é parte da programación do 8M do Concello de Ames.
- ‹ anterior
- 8 de 15
- seguinte ›