Pestanas principais

Departamento de Deportes

    • Enderezo: Praza do Concello, nº 2, Bertamiráns.
    • Teléfono:  981 88 30 02 / 619 84 25 04
    • Horario de atención ao público:
      • De luns a venres, en horario das 9:00 ás 14:00 horas.
    • Responsable municipal: Concellaría de Deportes
    • Responsable técnico: Alberto Viaño Moure.
Outros Datos: 
  • Programación escolas deportivas 2023-2024
  • Funcions:
    • Deseñar proxectos deportivos: escolas deportivas, eventos deportivos...
    • Planificar e xestionar programas deportivos e elaborar estratexias de funcionamento.
    • Incentivar a participación cidadá tanto nas actividades como na creación deportiva.
    • Asesorar e informar aos grupos e entidades deportivas do concello, así como ao público en xeral.
    • Colaborar nas programacións da Deputación: Campaña de esqui, campamentos deportivos, circuíto de carreiras populares...
    • Xestionar as subvencións correspondente á área de deportes, ben sexan as da Deputación ou as convocatorias propias do Concello de Ames de apoio ás asociacións deportivas e clubs.
    • Xestionar as instalacións deportivas municipais (pavillóns polideportivos, campos de fútbol e piscinas descubertas municipais).
  • Normativa:
  • Novas relacionadas
  • Axenda

Novas do departamento

A celebración da Gladiator Race Kids congregou a 230 participantes no Milladoiro

O Concello de Ames, a través da Concellaría de Deportes, organizou este sábado 28 de decembro a primeira edición da Gladiator Race Kids, unha actividade enmarcada dentro da programación de Nadal de 2024. A carreira celebrouse na área deportiva do Milladoiro e congregou en total a 230 nenos e nenas, facendo deste evento unha proposta diferente na que pasar a xornada en familia facendo deporte.

A Clásica de Pascua–Ruta Xacobea da Copa de España de ciclismo pasa por Ames este sábado 7 de maio

A Copa de España de ciclismo elite e sub-23 celebra a súa penúltima proba do ano este sábado 7 de maio, coa posta en marcha dunha nova edición da Clásica de Pascua-Ruta Xacobea de Padrón, organizada polo CC Padronés. Está previsto que o pelotón ciclista pase polo Milladoiro en dirección Santiago entre as 11:40 e as 11:55 horas, e por Bertamiráns, onde haberá un sprint especial, entre as 12:00 e as 12:20 horas. O paso dos ciclistas poderá causar retencións puntuais.

A compañía Pistacatro chega ao Milladoiro cunha proposta de obradoiros de circo en familia

O Concello de Ames, a través do departamento de Deportes, organiza para este venres 2 de agosto unha actividade de circo en familia. Estes obradoiros completan a programación das festas da Madalena, que se celebrarán dende o 2 ata o 6 de agosto. A compañía Pistacatro produtora de soños será a encargada de poñer en marcha no Milladoiro unha Escola de Saltimbanquis para coñecer todos os segredos do mundo do circo. As actividades impartiranse de 17.00 a 19.00 horas na área deportiva do Milladoiro. A partir das 19.00 horas comezará o Millarock cun concerto didáctico e co obradoiro “Sube e Toca”, ás 20:00 horas. Estas actividades do Millarock estarán organizadas pola escola A Casa do Rock.

A Concellaría de Deportes organiza unha nova iniciativa para este Nadal, a Gladiator Race Kids

O Concello de Ames, a través da Concellaría de Deportes, organiza para o sábado 28 de decembro unha nova iniciativa que se enmarca na programación de Nadal de 2024. Trátase da primeira edición da Gladiator Race Kids, que se vai a realizar na área deportiva do Milladoiro a partir das 16.30 horas. Esta actividade está pensada para nenos e nenas de 3 a 12 anos. Os menores poderán ir acompañados dun adulto. Haberá 250 prazas polo que é preciso inscribirse a través desta ligazón. A inscrición é gratuíta e inclúe a participación no evento, seguro e unha medalla por finalizar. O prazo de inscrición estará aberto ata o 25 de decembro ás 23.59 horas.

A concelleira de deportes visita os cursos de verán de natación e piragüismo

A concelleira de deportes, Susana Señorís, visitou á rapazada que este verán aprende a nadar ou perfecciona estilo nos cursos que se imparten nas piscinas descubertas de Bertamiráns e de Milladoiro. A concelleira tamén se achegou á praia de Tapia onde rapaces e rapazas de entre oito e catorce anos reciben clases de piragüismo.

A cuarta edición do Depor Campus contou con preto de 50 rapaces e rapazas en Ames

O campo de fútbol de Bertamiráns acolleu do 8 ao 12 de xullo a cuarta edición do Depor Campus en Ames, no que participaron preto de cincuenta rapaces e rapazas de entre 6 e 14 anos. Esta iniciativa organizada polo RC Deportivo da Coruña, que contou coa colaboración do Bertamiráns FC e do Concello de Ames, constou de cinco xornadas de adestramento e diversión cos adestradores do Real Club Deportivo, en horario de 10.00 a 14.00 horas. Nos adestramentos empregouse un método que fomenta valores como o xogo limpo, o respecto polo rival, o esforzo, a solidariedade e a amizade a través do deporte.

A deportista amesá Olivia Parga consegue a medalla de ouro na IV xornada da Liga Galega de karate

O pasado sábado, 11 de maio, celebrouse en Ribadavia a cuarta xornada da Liga Galega de Karate. Nesta cita, a deportista amesá, Olivia Parga, obtivo a medalla de ouro na categoría kumite xuvenil.

A deportista amesá Olivia Parga consegue a medalla de ouro na VI xornada da Liga Nacional de karate

Esta pasada fin de semana, do 9 ao 10 de novembro, celebrouse en Tarragona a sexta xornada da Liga Nacional de Karate. Nesta cita, a deportista amesá, Olivia Parga, obtivo a medalla de ouro na categoría kumite xuvenil. 

A deportista amesá Olivia Parga gana a Liga Nacional de Karate e proclámase Grand Winner de España

Esta pasada fin de semana, do 13 ao 15 de decembro, celebrouse en Pontevedra a fase final da Liga Nacional de Karate, onde participaron os oito mellores karatekas de España. Nesta cita, a deportista amesá, Olivia Parga, obtivo a medalla de ouro na categoría de xuvenil <37 kg. Este novo éxito, sumado aos resultados que xa obtivera nas anteriores xornadas de Avila e Tarragona, fixo que fose proclamada Grand Winner de España 2024. Ademais, o seu irmán, Xoan David Parga García, que competiu en kumite júnior <61 kg, obtivo un meritorio quinto posto que o sitúa entre os mellores karatekas da sua categoría.

A empresa BeOne que xestiona o centro deportivo A Telleira lanza a campaña "En setembro... Ponte On"

O Centro Deportivo Municipal da Telleira, xestionado por BeOne, lanza a súa campaña de setembro baixo o lema "Ponte On", convidando aos veciños a comezar (ou retomar) unha vida máis activa tras o verán. Desde o 26 de agosto e durante todo o mes de setembro, os interesados poderán gozar dunha proba gratuíta de 3 días. Ademais, aquelas persoas que se inscriban como socios durante este período gozarán de matrícula gratuíta.

Eventos del departamento

> Marcha nórdica: "Camiñando no solpor"

Un ano máis, o departamento de Promoción da Saúde do Concello de Ames está a desenvolver o programa “Activa Ames Verán”, unha adaptación das actividades do Ames Saudable que ten lugar durante a época estival, con propostas para o coidado da saúde física e emocional. Dentro desta iniciativa teñen lugar as marchas nórdicas "Camiñando no solpor", con saída dende O Milladoiro os días 10 e 24 de agosto e dende Bertamiráns os días 17 e 31 de agosto. O horario é de 20:30 a 22:00 horas. 

> Masterclass de baile

A Escola de Baile Danzaya organiza unha masterclass de baile para todas as idades, que se celebrará o sábado, 16 de setembro, no parque do Ameneiral, en Bertamiráns, ás 18:00 horas. Haberá clases dirixidas, exhibicións e actividades de danza. Non é precisa inscrición previa. En caso de choiva, a iniciativa trasladarase ao pavillón de Bertamiráns. 

> Masterclass de zumba no Milladoiro

O domingo 12 de febreiro, celebrarase unha masterclass de zumba no pavillón municipal do Milladoiro, a partir das 12:00 horas. Trátase dunha actividade aberta e de balde, pensada para rapaces e rapazas de entre 4 e 16 anos e para as súas familias. Os interesados en participar deben inscribirse previamente (ata o venres 10, ás 14:00 horas) premendo nesta ligazón e seguindo os pasos que se indican.

> Partido de fútbol solidario Bertamiráns FC - SD Urdilde

O Concello de Ames, a través da Concellaría de Deportes, o Bertamiráns FC e maila asociación Solidariedade Galega co Pobo Saharauí (SOGAPS) colaboran co obxectivo de recadar fondos para o programa Vacacións en Paz 2023. Deste xeito, a contía recadada a través da venda de entradas para o partido Bertamiráns FC – SD Urdilde, que se disputará este domingo 20 de novembro, será doada a SOGAPS para sufragar o programa Vacacións en Paz. O custe das entradas será de 4 euros. Ademais, venderanse rifas e haberá un stand informativo de SOGAPS durante a xornada do domingo na área deportiva de Bertamiráns.

> Partido de homenaxe a Fernando Seoane

Co fin de homenaxear a Fernando Seoane, veciño de Tapia e segundo xogador con máis partidos disputados na Segunda División de fútbol, o Concello de Ames organiza un partido de homenaxe que se vai disputar este domingo 14 de agosto, ás 19:00 horas, entre o CD Lugo e unha selección de xogadores de Ames, no campo de fútbol de Bertamiráns.

> Partido do FC Meigas na Copa Galicia

Este domingo, 3 de setembro, o FC Meigas, recentemente ascendido a segunda división nacional de fútbol sala feminino, enfrontarase ao FSF Castro, de primeira división, na Copa Galicia as 19:00 horas no pavillón de Bertamiráns.

> Regata provincial en Tapia

Un total de 10 clubs e 300 padexeiros e padexeiras van disputar este sábado, 5 de agosto, a regata provincial “Circuíto praia fluvial de Tapia”, organizada pola Deputación da Coruña, o club de piragüismo Ribeiras do Tambre e maila Federación Galega de Piragüismo. O Concello de Ames, a través da Concellaría de Deportes, colabora na organización de dito evento. A proba, que ten un percorrido de 1.500 metros polo río Tambre, comeza ás 16.00 horas e desenvolverase ata ás 20.00 horas aproximadamente. A saída e chegada estará instalada na praia fluvial de Tapia. Trátase da terceira das seis probas que conforman o II Circuíto de piragüismo Deputación da Coruña, no que compiten as categorías bases dos clubs da provincia.

> Regata Provincial – Circuíto praia fluvial de Tapia

Un total de 10 clubs e 350 persoas van disputar a Regata Provincial – Circuíto praia fluvial de Tapia, organizada polo Concello de Ames, a través da Concellaría de Deportes, o club de piragüismo Ribeiras do Tambre e a Federación Galega de Piragüismo. O evento, que conta cun percorrido de 1.500 metros polo río Tambre, terá lugar o sábado 6 na praia fluvial de Tapia, a partir das 16:00 horas. Trátase da quinta das seis probas que conforman o I Circuíto de piragüismo Deputación da Coruña, no que compiten as categorías bases dos clubs da provincia. Premendo nesta ligazón pódense consultar os datos e os horarios da Regata Provincial – Circuíto praia fluvial de Tapia.

> Segunda proba do circuíto Transgalaica 2023

O concello de Ames volve acoller este domingo, 12 de marzo, a segunda proba do circuíto de ciclismo de montaña Transgalaica 2023. Será a sétima ocasión na que o concello celebre este evento deportivo, unha das máis importantes do ciclismo no noroeste español. Esta proba está organizada polo club ciclista amesán Os Esfola Arrós e a empresa Team Relay, e conta coa colaboración do Concello de Ames. A saída realizarase dende o Pazo da Peregrina de Bertamiráns ás 9:30 horas, onde comezará un circuíto de 33 quilómetros que haberá que percorrer dúas veces. As inscricións están abertas ata este mércores 8 de marzo, ás 23:59 horas. A inscrición pódese facer premendo nesta ligazón ou accedendo á web magmasports.es.

> Seminario de defensa persoal feminina

A Deputación da Coruña organiza oito edicións ao longo da provincia dunha actividade na que as mulleres dos 14 aos 70 anos poderán aprender técnicas e estratexias para defenderse ante posibles agresións. Ames acollerá este curso intensivo de catro horas o sábado 26 de febreiro, entre as 10:00 e as 14:00 horas, no pavillón polideportivo municipal do Milladoiro. Para inscribirse de balde, cómpre entregar esta solicitude cuberta nos rexistros municipais ata o 30 de xaneiro.