Actualidade
Venres, 07 de febreiro de 2025
O auditorio da Casa da Cultura de Bertamiráns acolleu este pasado xoves, 6 de febreiro, a primeira xuntanza ordinaria do Pleno do Consello sectorial da Cultura de 2025. En dita xuntanza presentouse o informe – memoria Ames Cultura de 2024, no que se recolle a actividade de dinamización cultural, das bibliotecas municipais e da escola de música durante o ano pasado. Ademais, fíxose un avance sobre a programación de dinamización cultural que está pechada para 2025; e falouse de posibles cambios nas distintas liñas de subvencións que dependen do departamento de Cultura. Pódese consultar o informe completo na seguinte ligazón.
Xoves, 06 de febreiro de 2025
O Concello de Ames, a través do departamento de Cultura, organiza “Malabareando”, un obradoiro de malabares dirixido para os nenos e nenas a partir dos 6 anos e que se realizará o vindeiro xoves 13 de febreiro, ás 18.00 horas, no auditorio da Casa da Cultura de Bertamiráns. As crianzas deberán de estar acompañadas dun adulto. Hai 16 prazas dispoñibles, sen contar ás persoas maiores de idade, e os interesados en participar poden inscribirse enviando un correo a cultura@concellodeames.gal.
Mércores, 05 de febreiro de 2025
O Concello de Ames, a través do departamento de Cultura, continúa coa súa programación de artes escénicas do primeiro semestre do ano. Desta volta, o auditorio da Casa da Cultura do Milladoiro acollerá o vindeiro venres 7 de febreiro, ás 20.30 horas, a obra de teatro “Cortello de Amor”, da compañía Amorodio Teatro. Ata o momento, a ocupación para este espectáculo é do 80% das butacas dispoñibles. As últimas entradas pódense adquirir na Billeteira electrónica. Esta programación forma parte do convenio de colaboración entre a Axencia Galega das industrias Culturais (AGADIC) e o Concello de Ames.
Sábado, 01 de febreiro de 2025
O Concello de Ames acollerá do 4 ao 13 de febreiro unha tripla exposición da traxectoria artística de Fran Riveiro. A mostra contará con tres localizacións: unha parte das obras estarán expostas na Casa da Cultura do Milladoiro, outra na Casa da Cultura de Bertamiráns e, finalmente, unha terceira no Pazo da Peregrina de Bertamiráns. Deste xeito, exhibiranse algunhas das pezas e coleccións máis recoñecidas do artista como son “Urbania” e “Coffe paints”.
Martes, 28 de xaneiro de 2025
O Concello de Ames continúa a programación do Ames Cultural 2025 coa representación de “Entrega en Man”, da compañía Contraproducións S.L., este venres 31, ás 20.30 horas, no auditorio da Casa da Cultura de Bertamiráns. Aínda quedan entradas dispoñibles á venda, poden adquirirse a través da Billeteira Electrónica. Esta programación forma parte do convenio de colaboración entre a Axencia Galega das Industrias Culturais (AGADIC) e o Concello de Ames.
Sábado, 25 de xaneiro de 2025
O Concello de Ames, a través do departamento de Cultura, continúa coa súa programación de artes escénicas para o comezo deste ano. Desta volta, o auditorio da Casa da Cultura do Milladoiro acollerá o vindeiro venres 31 de xaneiro, ás 18.00 horas, a obra de teatro infantil “Kyoki” da compañía Elefante Elegante, incluída tamén na programación do Apego 2025. As entradas xa se poden adquirir na Billeteira electrónica. Esta programación forma parte do convenio de colaboración entre a Axencia Galega das industrias Culturais (AGADIC) e o Concello de Ames.
Venres, 10 de xaneiro de 2025
O auditorio da Casa da Cultura do Milladoiro acollerá este vindeiro venres 17 de xaneiro, ás 20.30 horas, a peza teatral “O dragón de ouro”, de Sarabela Teatro. Nesta obra trátanse temas de forte carga social como a trata de persoas ou a inmigración, dun xeito no que o elenco actoral interpela e interactúa co público, apelándonos directamente á reflexión respecto a estes asuntos. As entradas xa se poden adquirir na Billeteira electrónica. Deste xeito, o Concello de Ames inicia a súa programación de artes escénicas para a primeira metade do ano, composta por 13 obras dirixidas tanto a público adulto como infantil. Esta programación forma parte do convenio de colaboración entre a Axencia Galega das industrias Culturais (AGADIC) e o Concello de Ames.
Mércores, 08 de xaneiro de 2025
O concello de Ames é o lugar escollido por Álvaro Lamas para a presentación de “Capturando a Natureza”, que terá lugar este xoves ás 20.00 na no Auditorio da Casa da Cultura do Milladoiro e estará exposta ata o vindeiro 23 de xaneiro. A inauguración da exposición contará cun faladoiro e unha visita guiada polas obras da man do autor. Poderá visitarse, de forma gratuíta, desde o vindeiro venres día 9 ata o 23 de xaneiro en horario de 9.00 a 14.00 horas e de 16.00 a 22.00 horas na Casa da Cultura do Milladoiro.
Mércores, 01 de xaneiro de 2025
O Concello de Ames, a través da Concellería de Cultura, organiza este sábado 4 de xaneiro o Concerto de Reis, unha actividade enmarcada dentro da programación do Nadal en Ames. O recital terá lugar na Casa da Cultura do Milladoiro ás 19.00 horas. Os convites xa se poden descargar na Billeteira electrónica do Concello de Ames. A entrada será de balde ata completar aforo.
Mércores, 18 de decembro de 2024
Desde este mércores, 18 de decembro, xa están á venda os bonos culturais da programación municipal de artes escénicas para o primeiro semestre de 2025. Cun custo de 25 euros, este bonos supoñen un desconto do 50% do importe total das entradas das funcións programadas para adultos. A Concellería de Cultura pon a disposición da veciñanza 50 bonos, que poderán adquirirse ata o 7 de xaneiro de 2025, ou ata fin de existencias, na Billeteira electrónica do Concello de Ames. Dende a Concellaría de Cultura anímase á veciñanza a que regale cultura a través de ditos bonos. Pódese consultar a programación cultural completa premendo nesta ligazón. Ademais, realizáronse melloras nas funcionalidades da Billeteira electrónica co obxectivo seguir impulsando esta aplicación e que vaia máis alá da venda de entradas.
- ‹ anterior
- 3 de 63
- seguinte ›