Concello de Ames continúa coa súa programación de actividades polas festas de Nadal, desta volta coa estrea dun tren que percorrerá os días 3 e 4 de xaneiro as rúas de Milladoiro e Bertamiráns, unha actividade enmarcada na programación da Gran Festa de Reis. Este servizo de tren, totalmente gratuíto, estará dispoñible en ámbalas vilas o venres pola tarde de 17.00 a 19.30, e o sábado pola mañá de 11.00 a 13.00 e pola tarde de 17.00 a 19.30 horas. Cómpre destacar que o sábado pola tarde, en Bertamiráns, o tren terá un percorrido alternativo pola coincidencia co mercado.

O Concello de Ames, a través da Concellaría de Promoción Económica, organiza para este martes, 31 de decembro, as súas xa tradicionais prebadaladas, enmarcadas dentro da programación do Nadal en Ames. As prebadaladas, presentadas este ano por Fátima Pego, celebraranse na Praza do Concello ás 12.00 horas e repartiranse para os asistentes bolsas con cotillón, lambetadas sen glute e batidos para os máis pequenos e, como novidade, tamén se repartirán mochilas vibratorias para as persoas con discapacidade auditiva ademais de contar cunha intérprete de lingua de signos. O acto tamén contará coas actuacións das gañadoras da última edición do Canta con Ames. Na praza instalarase unha carpa para que os asistentes poidan gozar da actividade en caso de previsión meteorolóxica adversa. 

O auditorio da Casa da Cultura do Milladoiro acolleu o pasado xoves, 19 de decembro, a Gala de entrega de premios do X Certame de fotografía comercial do parque empresarial Novo Milladoiro. O acto estivo presentado por Carlos Blanco. Durante a gala proxectáronse as fotografías premiadas durante as nove edicións anteriores, vendo deste xeito, a evolución do parque empresarial e a progresión a través do tempo do propio certame. En representación do Goberno municipal asistiron o alcalde de Ames, Blas García, a concelleira de Promoción Económica, Ana Belén Paz, e o concelleiro de Xestión do Medio Natural, Atención ao Rural e Patrimonio, Javier Antelo. O Flatiron, Gulliver e Chegando co Futuro na Man foron as tres fotografías premiadas.

O Concello de Ames traballa na organización das Cabalgatas de Reis, que se celebran o domingo 5 de xaneiro nas localidades do Milladoiro e Bertamiráns. Para participar en ditas Cabalgatas abriuse un prazo de inscrición co obxectivo de que as nenas e nenos do concello poidan acompañar aos Reis Magos nas carrozas. O período de inscrición estará aberto ata o domingo día 22 de decembro. A capacidade de cada carroza é de 14 rapaces, sendo as prazas ofertadas un total de 84. Poderán participar menores en idades comprendidas entre 6 e 12 anos, empadroados en Ames e que non participaran en cabalgatas anteriores. No caso de que non haxa rapaces suficientes para algunha das cabalgatas, poderase propoñer a cobertura con nenos e nenas que non teñan as preferencias solicitadas. Premendo nesta ligazón podes ver o vídeo sobre a entrega de capas reais de 2023.