Alumnado do IES do Milladoiro acaba de recibir un dos premios da categoría escolar da oitava edición Certame Enreguéifate, o premio á regueifa máis inclusiva, polo traballo realizado en colaboración co CEE Manuel Navalón. O vídeo premiado denomínase Radio Regueifa Inclusiva “Somos diferentes, somos referentes” e nel o alumnado de ambos os dous centros regueifa conxuntamente e a través das ondas para demandar inclusión, diversidade, respecto e non discriminación. 

O programa do Apego segue a ofrecer unha ampla oferta de actividades para as crianzas amesás ao longo deste vindeiro mes de abril. Desta volta, co espectáculo do Mago Paco “A Maxia está nos contos”, que se desenvolverá o venres 11 de abril, ás 18.00 horas, na Casa da Cultura do Milladoiro. O prazo de inscrición está aberto ata o xoves día 10. Non se admitirán inscricións fóra de prazo e as prazas asignaranse por orde de recepción de solicitude. Para participar, é preciso enviar un correo ao enderezo electrónico normalizacion@concellodesmes.gal no que se indique o nome e apelidos das persoas que queren asistir, idade das crianzas e un teléfono de contacto.

O programa do Apego segue a ofrecer unha ampla oferta de actividades para as crianzas amesás ao longo deste vindeiro mes de abril. Desta volta, co espectáculo musical “O cuco veu por acá e marchou por alá” da compañía Percubebés, formada por Marcelo Dobode e Bea Martínez, que se desenvolverá o venres 4 de abril, ás 18.00 horas, na Casa da Cultura de Bertamiráns O prazo de inscrición está aberto ata o xoves día 3. Para participar, é preciso enviar un correo ao enderezo electrónico normalizacion@concellodesmes.gal no que se indique o nome e apelidos das persoas asistentes, idade das crianzas e un teléfono de contacto.

O proxecto Enreguéifate ultima os preparativos para clausurar esta oitava edición co certame de regueifas en vídeo, cuxo prazo de inscrición remata o vindeiro 20 de marzo de 2025. Para anotarse é preciso enviar un ou máis vídeos, cunha duración máxima de 3 minutos, nos que aparezan cando menos 2 persoas regueifando sobre un tema libre. As bases completas poden consultarse na páxina web do certame, a través da cal tamén pode facerse a inscrición. Os servizos de normalización lingüística dos Concellos de Ames, Carballo, Pontevedra, Santiago de Compostela e Teo impulsan este proxecto de dinamización lingüística que pon en valor a regueifa, unha das expresións da poesía popular oral galega.