Pestanas principais

Departamento de Normalización Lingüística

    • Enderezo: Pazo da Peregrina. Avenida de Azcárraga, nº 5, Bertamiráns. 15220 Ames.
    • Teléfono:  662 37 72 15
    • Horario de atención ao público: de 9:00 - 14:00 h
    • Responsable municipal: Concellaría de Normalización Lingüística
    • Responsable técnica: Rosa Moreiras Cuñarro, técnica de normalización lingüística
    • Obxectivo principal do servizo:
      • Incrementar o uso e o prestixio da lingua galega en todos os ámbitos municipais.

O Servizo de Normalización Lingüística do Concello de Ames recibe unha subvención anual para gastos de persoal da Deputación da Coruña e outra da Xunta de Galicia.

Outros Datos: 
  • Funcións:
    • Asesorar e colaborar coa planificación lingüística do Concello de Ames
    • Promover actuacións para aumentar o uso do galego no ámbito municipal, de acordo coa normativa vixente, e entre a veciñanza
    • Contribuír á formación lingüística da veciñanza e do persoal municipal
    • Mellorar a calidade lingüística e comunicativa do Concello de Ames
    • Informar e asesorar sobre dereitos lingüísticos da veciñanza e deberes lingüísticos municipais
    • Asesorar sobre cuestións lingüísticas á veciñanza e ao persoal municipal

Novas do departamento

A RAG edita unha guía para o plurilingüismo inclusivo dende o galego

A Real Academia Galega presentou este luns, 6 de xuño, Ideas para un plurilingüismo dende o galego no Concello de Ames, unha guía que pretende contribuír á reflexión sobre a situación sociolingüística, ofrece aclaracións conceptuais sobre o tema que aborda e propón estratexias de cara á planificación nos centros educativos dende a premisa do ecolingüismo como “unha aposta ética e unha opción viable”. A publicación avoga así por construír a partir do galego un plurilingüismo inclusivo, que non se limite a unha visión instrumental centrada exclusivamente na competencia en varios idiomas e que reforce tamén o respecto pola diversidade cultural.

A Real Academia Galega e o Concello de Ames blindan o proxecto ‘Modo galego, actívao!’ cun convenio ata o ano 2026

No curso 2022-2023 a Real Academia Galega e o Concello de Ames estrearon Modo galego, actívao!, un proxecto colaborativo pioneiro que implicou, tras un rigoroso diagnóstico da situación de partida, a posta en marcha de iniciativas de dinamización lingüística alén das aulas entre a rapazada dos colexios de infantil e primaria deste municipio da área periurbana de Santiago de Compostela. Tras os bos resultados obtidos na experiencia piloto, ambas as partes decidiron estender a colaboración coa sinatura dun  convenio ao abeiro do cal se prevé ampliar o programa aos primeiros niveis da ESO nos vindeiros cursos, entre outras medidas que comparten o obxectivo común de frear o abandono do galego na infancia.

A Real Academia Galega edita unha guía para o plurilingüismo inclusivo dende o galego

A Real Academia Galega presentará o luns 6 de xuño, ás 20.00 horas, Ideas para un plurilingüismo dende o galego no Concello de Ames. O acto de presentación realizarase no auditorio da Casa da Cultura do Milladoiro. A guía responde á demanda de formación do profesorado sobre o tema que aborda, ofrece aclaracións conceptuais e propón estratexias de cara á planificación nos centros educativos.

A Real Academia Galega, o Concello de Ames e representantes da comunidade escolar presentan os resultados da experiencia de inmersión lingüística de preto de 3.000 nenos e nenas

A Casa da Cultura de Bertamiráns acollerá mañá mércores, 22 de marzo, a presentación da valoración dos resultados da experiencia de inmersión lingüística na que participaron durante tres semanas de preto de 3.000 nenos e nenas dos centros educativos de infantil e primaria amesáns no marco do proxecto Modo galego, actívao!, promovido pola Real Academia Galega e o Concello de Ames. O acto, de entrada libre, terá lugar a partir das 19:00 horas e contará coa participación de representantes da Academia e do Concello e mais da comunidade educativa. Estrearase ademais un vídeo de sensibilización gravado por alumnado, e que poderá verse nas redes sociais da Academia e do Concello de Ames.

A sesión de contos con música en directo para bebés, “Comerá o bebé?”, terá lugar o próximo xoves, 13 de febreiro, na Casa da Cultura de Bertamiráns

“Comerá o bebé?” é unha sesión de contos, poemas, xogos de mans, música e moito máis encadrada dentro do programa Apego. Terá lugar o próximo xoves, 13 de febreiro, na Casa da Cultura de Bertamiráns, en dúas sesións: unha ás 17.30 horas e outra ás 18.30 horas. Unha actividade de balde, destinada a familias que se encontren agardado un bebé ou teñan crianzas de menos de 3 anos.

A V Festa do Apego celébrase na Casa da Cultura de Bertamiráns e no Pazo da Peregrina

O Concello de Ames, a través da Concellería de Normalización Lingüística, organiza a V Festa do Apego, que se celebra ao longo de toda a xornada de hoxe no Pazo da Peregrina de Bertamiráns a excepción dos concertos de Golfiños e  Oviravai, que trasladan á Casa da Cultura de Bertamiráns. Haberá maxia, contos con música, xogos, concertos, teatro de monicreques, obradoiros e moitas máis actividades. A entrada é libre e de balde. Premendo nesta ligazón pódese acceder á programación completa do evento. A través desta ligazón pódese acceder á galería de imaxes do evento.

Aberta inscrición para participar na andaina de presentación da Ruta Apego de Lens

O xoves, 16 de setembro, presentarase a Ruta do Apego de Ames, situada nun dos tramos da ruta das Ribeiras do Tambre, entre os lugares de Lens e Oca. Con este motivo organízase nun andaina guiada dirixida a familias con crianzas na se realizarán actividades ambientais. As persoas interesadas en asistir  poden anotarse ata o 15 de setembro enviando un email a normalizacion@concellodeames.gal no que se indique nome e apelidos das persoas quen van participar,  idade das crianzas e un teléfono de contacto.

Aberto ata o 30 de abril o prazo para participar no XXII Certame Literario Concello de Ames

Desde a Concellaría de Normalización Lingüística lémbrase que está aberto o prazo para participar na XXII edición do Certame Literario de Ames, no que todas as persoas que o desexen poden presentar os seus textos inéditos de temática libre escritos en lingua galega. O prazo de presentación está aberto ata o vindeiro día 30 de abril. Pódese consultar o resumo das bases do certame na seguinte ligazón e descargar a ficha de participación nesta outra ligazón. Así mesmo, tamén se pode consultar o folleto con toda a información desta edición do Certame Literario na seguinte ligazón.

Aberto o prazo de inscrición no obradoiro Familia Delas Fest, que se celebra este venres, día 1

O festival feminista de arte urbana e contextual, o Delas Fest, desenvolve por primeira vez en Ames o Familia Delas Fest, un obradoiro que busca achegar á cativada á arte urbana contextual dun xeito lúdico. Será este venres, 1 de setembro, ás 17:00 horas no Pazo da Peregrina de Bertamiráns. A actividade destínase a familias con crianzas a partir de 3 anos. Para inscribirse é preciso enviar un correo ao enderezo electrónico 7hcoop@7hcoop.gal ou cubrir este formulario.

Aberto o prazo de inscrición para a actividade “Cantando con raíz”, do programa Apego

Dende hoxe, xoves, 19 de xaneiro, están abertas as inscricións para “Cantando con raíz”, a nova actividade que organiza o departamento de Normalización Lingüística de Ames dentro do programa Apego, e na que a cativada poderá aprender cancións, ditos e recitados para achegarse á lingua dun xeito natural e divertido. O taller, dirixido a familias con crianzas de entre 0 e 6 anos, desenvolverase na Casa da Cultura do Milladoiro o venres, 27 de xaneiro, ás 18:00 horas. Para participar cómpre inscribirse, ata o xoves 26, enviando un correo ao enderezo normalizacion@concellodeames.gal no que se indiquen nome e apelidos das persoas asistentes, teléfono de contacto e idade das nenas e nenos.

Eventos del departamento

> Gala dos Premios Lingua e Empresa

O Concello de Ames, a través do departamento de Normalización Lingüística, organiza un ano máis os Premios Lingua e Empresa, que promoven o uso da lingua galega no ámbito empresarial local. Nesta ocasión triplicouse a participación con respecto a edicións anteriores, e foron 26 as empresas de distintos lugares do municipio que se presentaron a esta convocatoria. Dúas delas recoñeceranse con premios de 1500 euros e unha campaña publicitaria en Ames Radio, a emisora municipal.

> Gala homenaxe a Rosalía de Castro

O sábado 25 de febreiro, a partir das 19:00 horas, terá lugar a gala de homenaxe a Rosalía de Castro organizada polo Concello de Ames, na Casa da Cultura de Bertamiráns. Contará coa presentación da xornalista Esther Estévez e coa actuación de Najla Shami. Ademais, participarán tamén os centros educativos de infantil, primaria e secundaria.

> III Festa do Apego

O Concello de Ames, a través da Concellaría de Normalización Lingüística, organiza a terceira Festa do Apego de Ames, que se celebrará o sábado 18 de xuño. As actividades desenvolveranse no Pazo da Peregrina. Se chove, as actividades trasladaranse á Casa da Cultura de Bertamiráns. Haberá contos, música, xogos e moitos máis recursos para gozar coa e desde a lingua. Ademais, as librarías municipais, Lenda e Máinomen, en Bertamiráns,  e Nenos Nais, no Milladoiro, ofrecerán un 10% de desconto en materiais infantís en galego durante toda a xornada. O prazo de inscrición para as actividades estará aberto dende o 9 ao 16 de xuño. As reservas realizaranse enviando un correo ao enderezo normalizacion@concellodeames.gal indicando as actividades ás que se quere asistir, nome e apelidos das persoas solicitantes, idade das crianzas e teléfono de contacto.

> IV Festa do Apego

O Concello de Ames, a través da Concellaría de Normalización Lingüística, organiza a cuarta Festa do Apego, que terá lugar o sábado, 6 de maio, no Pazo da Peregrina ou na Casa da Cultura de Bertamiráns, dependendo da meteoroloxía. En caso de que chova as actividades trasladaranse ao centro sociocultural. Pola contra, se non chove, a programación manterase segundo o previsto no Pazo da Peregrina. Haberá contos, xogos, música, monicreques, obradoiros, espazos de recursos e moitas máis actividades. A entrada será libre e de balde. As prazas de cada unha das actividades iranse cubrindo por orde de chegada dos usuarios e usuarias. Premendo nesta ligazón podes ver un vídeo coa programación da Festa do Apego de Ames.

> Presentación do libro do XIX Certame Literario do Concello de Ames

Os departamentos de Normalización Lingüística e de Bibliotecas de Ames organizan, con motivo da celebración do Día do Libro, o acto de presentación do libro do XIX Certame Literario do Concello de Ames. Terá lugar o sábado 22, ás 19:30, no auditorio da Casa da Cultura de Bertamiráns. 

> Seráns de Ames: Foliada con Apego

Os Seráns de Ames continúan en Tapia cunha nova edición da Foliada con Apego, unha actividade chea de música para compartir, cantar, bailar, aprender cancións galegas e pasalo ben. Será o xoves 18 de agosto, ás 19:30 horas, coa actuación de Pablo Díaz e Olga Kirk.

> Sesión virtual do programa Apego con “Contos de medo que deixan durmir”

“Contos de medo que deixan durmir”, a primeira das actividades propostas polo programa Apego para este trimestre, desenvolverase de xeito virtual por mor da loita contra a pandemia da Covid19.
A sesión corre a cargo de Caxoto contacontos.
Non hai limitacións de aforo. Porén, hai que inscribirse previamente enviando un correo electrónico ao enderezo normalizacion@concellodeames.gal ou chamando por teléfono ao 662 377 2175.  

O prazo para inscribirse remata o mércores, 28 ás 14:00 horas. 

Logo, entre as 17 e as 21 do xoves, 28 de outubro, calquera persoa que o desexe e que estea previamente inscrita poderá premer na ligazón que se lle envíe e acceder ao contacontos.

> Teatro: "Rosalía"

A Casa da Cultura de Bertamiráns acolle a representación de "Rosalía", unha aproximación á vida e a obra da maior figura da literatura galega, que busca contarlle á cativada que a infancia é o lugar onde medran os poetas e as poetisas. A obra teatral terá lugar o xoves 17 de febreiro, ás 18:00 horas, dentro da programación do mes de Rosalía. Os convites, de balde, poden retirarse xa na Billeteira electrónica do Concello de Ames. Colaboran a Rede de Dinamización Lingüística da Xunta de Galicia e o Servizo de Normalización Lingüística de Ames.

> Teatro: Baby Esferic

Baby Esferic, de Aboon Teatre, pasará o día 6 de outubro polo auditorio do Milladoiro. Realizaranse dous pases, ás 18:00 e ás 19:00 horas. O aforo será de 80 persoas por pase. Trátase dunha representación enfocada a crianzas de entre 6 meses e 3 anos, un espectáculo innovador de linguaxe visual que busca espertar a imaxinación de grandes e pequenos. Os espectadores gozarán dunha viaxe con simpáticos habitantes esféricos que lles amosarán a maxia da terra, a ritmo de bebé. Premendo nesta ligazón podes consultar o dossier da obra ao completo. Tras a representación, que dura arredor de 30 minutos, as familias poderán gozar de 15 minutos de interacción e xogo coas personaxes. Os convites son de balde e pódense descargar na Billeteira electrónica do Concello de Ames. 

> Visita do Apalpador

O Apalpador volve a visitar Ames da man do programa Apego. Con Anxo Moure e a Banda da Montaña o Nadal chega cargado de contos, cantos e agasallos máxicos nacidos na Serra do Courel. O Apalpador tamén recollerá as cartas que os nenos e nenas lle queiran deixar. A actividade está dirixida ao público familiar e é de balde. A inscrición pódese facer do 5 ao 14 de decembro enviando un correo electrónico ao enderezo normalizacion@concellodeames.gal.